Sie sind hier

Fehlermeldung

The spam filter installed on this site is currently unavailable. Per site policy, we are unable to accept new submissions until that problem is resolved. Please try resubmitting the form in a couple of minutes.

Fasnachts-Zeedel "s'Schöttelet"

geschrieben von admin am Fr, 28/02/2003 - 09:56
So gefiel mir der Anlass: 
0
Noch keine Stimmen

 Sujet : s` Schöttelet (Fasnacht 2003)

Dr Babbe hett gsait , s` Mammi hett gsait,
es passi nymm , das Kleid wo-sy grad drait.
Drumm ab , in-d city, in-e Schop go schoppe,
s` Mammi sait , dr Babbe sait , s` Bütsche wurdi floppe,
denn dä Lumpe , karriert , uss beschtem Twiiid
passe wurd -er scho , eher z`wiiiid ,
schmeggt no nassem Schoof .
Ich ( 8 joor alt ) find dä Faane doof.
S` Mammi total faszinöös
Dr Babbe maint , dr Pryys sig skandalöös
d Verkaiverin ewäähnt , Tschiins ,die währe jetz passé
hitt kauft me Klamotte ,meid in ecossé
 
Zum Lade uss , s`Mammi glügglig , stolz
Dr Babbe hindedry , stumm wie e Fisch uss Eicheholz ,
ich bi wie immer hinte-n- nochetröttelet
jetzt waiss ich , was das heisst , es schöttelet
 
Doch am Obe ,ich ha s` Mammi nymmy kennt ,
das e sottigy Prinzässyn mit mim Babbe......an die Party rennt.
Also,die zwai sinn verdufdet
ich ha em babbe sy ''after-schäif ", uss dr Wohnig gluftet
schalt dr T-v aa ,es kunt e-n- alte Bond
äär isch dunggel , kuuul ,extrem.... und sie isch blond ,
also s` Mammi hett mir hytt besser gfalle.....
 
Do wird ich gweggt , ...vom Mammi.....aaa scho doo ,
Joo , mir synn mitt-em Taxi koo .
Dr Babbi schlooft im Badzimmer , er isch sälber dert iine gloffe ,
s`Mammi hett gsait , dr Babbi hett e paar Schotte troffe.
 
Am Donnschtig druff , hett dr Babbi gseit
und sy Stirne in Falte glait ,
s`Blatt wurdi sich wände ,
hejoo...är trait e Rock um siiny Lände
jetzt traagi är e bsundere Stoff in d`Stadt
i- glaub s`Mammi findet`s nyt sehr glatt.
Är trääffy , dert bim Mynschter hinde ,
wiider dr mac..sowiso , .... ebe syni Schottefrynde.
 
Ich aber bi mit-em Mammi ab ins Trämmly.
Au in d`Stadt , in d Freye.. nämmli ,
am Trottoir-rand , ganz vorne an dr Kante ,
nääbe mir ä-n-alty Dante .
Dooo ......pletzligg...dumpfy drummle, hoochy Deen
wo aym duur alli Glyyder geen .
Vom Minschter här kemme Pfiffer und Tambuure alli im Rogg ,
au d` Männer , s Mammi hett ganz -nassy Händ ,ich glaub vom Schogg .
D` Bagge synn ziemligg stargg erröttelet ,
ich ha denn gsait , gäll ,dasch-geil , wenn`s schöttelet
 
S` Mammi hett mir den erkläärt , das syyge " pip..'',.ich ha-s vergässe,
mir synn denn in-e Fescht-zält gsässe ,
dr Babbi hänn mir denn au gseh ,
s` Mammi maint , dr Babbi haig denn morn am morge wider weh ,
wäge syne Frynde ,uss em Schotteland
i- ha`s nit verstande , aber es isch allerhand
dr Babbe isch denn noo in säller Nacht
mit Buuchweh in dr Badwanne uffgwacht
 
Doch s`allerscheenscht am Schluss .
Dr Fc-Baasel , gross im Schuss ,
är hett in Glasgoo jede yberzygt .
Ä Bombe-schuttmatsch aanekickt,
druffaabe , doo im Joggeli-park (em bruune)
duet halb Europa wider stuune .
Vo iiberall wird unsre FC gföttelet
do hetts denn aber nymmi gschöttelet.
Und zmittsdrinn , ich mit em Mammi und em Babbe
Im rot-blau Dress und Dreyschtreiffe-schlappe.
Mir sinn denn heim, a-schottisch- frye ins Bett go keie
Ohni Buuch- , aber Halsweh ,vom vyyle schreye !!!
 
Sytt letscht Joor waiss ich ,wenn sicher ich in d`Stadt due renne :
Nämlig denn , wenn näggschtmool d`Schotte kemme.c
 

Neuer Kommentar schreiben