Sie sind hier

Fasnacht 2013

geschrieben von admin am Fr, 08/03/2013 - 09:56
So gefiel mir der Anlass: 
0
Noch keine Stimmen

Mir binde alles aa - sunscht hänn mer Fasnacht kaa!

Blyybsch wie e Esel stoo,
froogsch di, wo ha ich d'Drummle aane doo?


Dänggsch, au vereggt,
haa ich sii äggscht verleggt?
Duesch sii niene gsee,
denn kunnt dir die bleedi Idee:
Nai, es isch verdelli veruggt,
e soone dumme Siech hett sii gmuggt.
Mee duet sich eeländ fyyle,
s'isch aifach nur zem Hyyle,
wo d'Drummle gstaande isch, ischs läär,
s'Härz wiird aim ganz schwäär.
Me findets nur no unverschämmt,
dr Kessel isch in fremde Händ.
Die, wo Instrumänt aifach nämme,
sette sich in Grund und Boode schämme,
jezt sinn sii wiider uff dr Pischte,
nit Duurischte, sondern glauendi Zivilischte.
S'wäärde Piccolo, Larve, Drummle gstoole,
verdelli, die sell wirgglig dr Deifel hoole.
E so ebbis duet aim die scheenschte Dääg versaue,
kasch aifach niemerem me draue!
Muesch verdelli di Ziigs aabinde,
damit's wiider duesch finde.

Muesch mol go e Brunne mache,
bruuchsch ebber wo s'Ziigs duet bewaache,
kasch nit aifach alles liige loo,
sunscht isch's den uff aimol nimmi doo.

Hoggsch in dr Baiz, issisch e Suppe,
yyne kunnt e Mentschegrubbe.
Leegsch s’Piccolo aane fir e Momänt,
gischs uus diine sichere Händ.
Ebber vo dääre Grubbe duet dernoo gryffe
und scho kasch uffs Pfyffe, pfyffe!
Luegsch aimol nit, hesch dr Drägg,
scho isch dii Speiholz ewägg.
Scho wiider ebbis me an dr Fasnacht gstoole,
am liebschte wuurdsch so ebber versoole.

Larve verleege isch au kai Gägg,
kunnsch uus dr Baiz, mainsch d'Larve isch wägg.
Me duet langsam duuredraaie,
S'wird gsuecht in allne Hiiserraaie,
ändlig duet me sii wiider finde,
aanere andere Egge ganz hinde.

Mer frooge iis, wo blyybe do d'Maniere?
Raiber dien aifach so ummeflaniere,
sii dien uff Aastand pfyffe,
und sich au an Requisite vergryffe.
S'Requisit wird baut in männger Stund,
me hett e riise Fraid, wenns scheen uuse kunnt,
s'wird voller Stolz am Cortege zooge,
nai, do gits aim aifach dr Booge.
£Baut hesch denn die tolli Kunscht
aifach so, ummesunscht.
Froogt me sich, was isch jezt gschee?
Wäg isch's me hetts niemee gsee.

Froogsch di scho, nundefaane,
wo kemme die Sache numme aane?
Die dien d'Fasnacht nit schetze,
e sälber gmachti Larve kasch nit ersetze!
Zerscht duesch die mit liebi kaschiere,
moole und denn au no laggiere.
Denn hett me sii aa scho als glaine Gnopf,
die sälber gmachti Larve uff em Kopf.
So e Zug isch doch denn e Bracht,
vor allem alles sälber gmacht.
Uff aimol isch die Larve denn nimmi doo,
hett sii aifach ebber mit haime gnoo.
Me froggt sich wirgglig, was das soll.
Mir hänn aifach d'Naase voll!

Wotsch du e Larve ummsverwoorge,
due dir doch aini bim Larvemacher bsoorge,
Mi wurds Gwisse gwääle,
wurd ich an dr Fasnacht stääle!

Drum binde mir alles aa,
sunscht hänn mer Fasnacht kaa!

(Zeedel aabelaade [pdf])

Neuer Kommentar schreiben

Type the characters you see in this picture. (verify using audio)
Type the characters you see in the picture above; if you can't read them, submit the form and a new image will be generated. Not case sensitive.